أضيف في 13 يناير 2017 الساعة 00:44

كاتم صوت!


حسام الدين فكري

قصة: حسام الدين فكري...

"كانوا يصرخون في قلب الليل، فكتمنا أصواتهم إلى الأبد" !.

اهتزت النجوم فوق بدلته الأنيقة، وهو يضم كعبيه بقوة، فتصدر فرقعة وتثير شيئا من الغبار، ثم يهتف قائلا :

- تمام يافندم !

تأمله رئيسه بضع لحظات، ثم أدار بصره في مجموعة الرجال التي تقف خلفه، قبل أن يقول :

- أهلا ياخويا..عملت إيه ؟

- سيادتك ماقريتش السطر الأولاني ؟!

- لا يا فالح..قرأته..بس مافهمتش حاجة

- إحنا نفذنا كل أوامر جنابك

- اللي هيه إيه ؟!

- إن اللي يفتح بقه..نخرسه على طول

- حلو أوي..وده بقى عملتوه ازاي ؟!

- إحنا يافندم رفعنا...

- رفعتوا إيه..رفعتوا الشعب ؟!

- لا يافندم..إحنا رفعنا حاجات تانية

- رفعتوا الأسعار..الجمارك..الدولار..الضرايب..ولا إيه بالظبط ؟!

- دول رفعناهم من زمان

- أمال رفعتوا إيه ؟!

- رفعنا اللي أهم من كده..ونفخنا...

- نفختوا إيه..نفختوا الشعب ؟!

- ما إحنا نفخناه من زمان !!

- أمال نفختوا إيه ؟!

- طيب خلينا في اللي رفعناه الأول

- اتفضل يابُرم !

- إحنا سعادتك رفعنا السقف !

- سقف إيه ؟!..يعني الشعب عايش من غير سقف ؟!

- لا يافندم..السقف موجود

- ازاي رفعتوه..وبرضه لسه موجود

- ماهو سيادتك كل واحد عنده سقف خاص به

- أمال سقف إيه اللي اترفع ده ؟!

- السقف اللي كان جامع الناس ومغطي البلد كلها

- ياولاد اللذينة..عملتوا فيه إيه ؟!

- رفعناه..خلاص اتبخر..مابقاش موجود

- يابني إيه الكلام ده..أهو موجود..أنا شايفه كويس

- ماهو سيادتك تشوفه..إنما الشعب مايشوفهوش

- مش فاهم..هو أنا مش من الشعب

- لا يافندم..معاليك من القيادات..إنما الشعب حاجة تانية

- يعني إيه ؟!

- يعني إحنا عملنا برمجة للشعب بس..إنما القيادات فضلت زي ماهيه..بنفس الدماغ والتفكير وكل حاجة !!

- يعني لعبتوا في دماغ الناس..مش كده

- تمام يافندم..ونفخنا...

- أيوه..نفختوا إيه بقى ؟!

- نفخنا روح الفرد

- يعني إيه ؟!

- يعني كل واحد يشوف نفسه بس..مافيش حاجة اسمها روح الفريق..ولا الجماعة..ولا الاتحاد قوة..زي ماكنت سيادتك بتسمع قبل كده !!

- والكلام ده كله راح فين ؟!

- اتبخر يافندم مع السقف !

- طيب يافالح ماهي الناس لسه بتتكلم..أمال بتقول خرستوها إزاي ؟!

- يافندم كله بيكلم نفسه..ماحدش بيكلم حد..ولو اتنين اتكلموا مع بعض بيبقى حوار الطرشان..يعني ماحدش فاهم حد !

- ياولاد اللعيبة !..انتوا طلعتوا محترفين حقيقي

- تلامذتك يافندم

- تلامذتي إيه بس..إنتوا أساتذة..تعالى يابني هنا..اقعد مكاني!

- العفو يافندم

- والله لتيجي..دي أقل حاجة أقدمها..لعباقرة زيكم !!


قيم وشارك المادة :


  
كاتب الموضوع : حسام الدين فكري

كاتب صحفي   / cairo , مصر

مواضيع أخرى قد تعجبك أيضا :


أضف تعليقك على الموضوع
* كاتب التعليق
* عنوان التعليق
  * الدولة
* التعليق