أضيف في 29 دجنبر 2016 الساعة 01:38

حوار كل يوم !


حسام الدين فكري

حسام الدين فكري...

الزبون : بكام القميص ده ؟

البائع : 400 جنيه

الزبون : ليه ياعم..أنا شايفه الأسبوع اللي فات ب 250 جنيه!

البائع : صحيح..أهو حضرتك بتقول الأسبوع اللي فات..يعني من 7 أيام..تعرف بقى الأسعار بتزيد كام مرة في الأسبوع ؟!

- كام مرة يعني ؟!

- يعني..بمعدل 3 أو 4 مرات في اليوم..يعنى نقول 25 مرة في الأسبوع !!

- يانهار أبيض..ليه ده كله ؟!

- ما هو الدولار بيزيد حضرتك..وكل حاجة بتزيد معاه ؟

- وأنا مالي بالدولار..أنا هلبس القميص ولا الدولار ؟!

- إنت بتلبس الدولار..بس على شكل قميص !!

- ياسلااااام..هيه بقت كده !

- زي مابقولك يابرنس..ومش لوحدك..كلنا لابسين الدولار..بس المشكلة إن اللي متغطي بيه عريان !

- إزاي يعني ؟!

- أصله مالوش أمان..ومالوش كلمة..ولا ذمة..ولا ضمير..وعامل زي الزيبق..مالوش مسكة أبداً..شوية طالع..وشوية نازل !!

- إنت قصدك بنازل دي زمان..مش كده..لما كان حبة فوق وحبة تحت..إنما دلوقتي شارخ على فوق بس !!

- أهو حضرتك فهمتني..وطبعا السعر على طول طالع معاه..تصدق بإيه..كل ما أحط تيكيت بسعر معين يروح الدولار طالع..أروح كاتب سعر تاني..وعلى كده كل يوم..لدرجة بقيت بشتري تيكتات أكتر ما بشتري قمصان وبنطلونات للمحل !!

- يعني إنت زهقت وانت اللي بتبيع..أمال اللي بيشتري بقى يقول إيه ؟!

- ياباشا ما هو أنا كمان زبون..وكله كاس وداير ع الجميع..أنا هنا بياع..إنما في محل الفول زبون..وعند السمكري..والسوبر ماركت..والفاكهاني..ومليون مكان تاني !!

- عندك حق برضه..طيب رأيك نعمل إيه..نبطل نشتري أي حاجة ونريح دماغنا ؟!

- ياريت كان ده الحل..إنما الحكاية أصلها أكبر من كده بكتير..بيني وبينك هيه فلتت منهم ومش عارفين يلموها!!

- هيه إيه..وهمه مين ؟!

- ماليش دعوة..أنا ماقلتش..وانت ماسمعتش !

- ياجبان..للأسف إنت منك كتير جداً..علشان كده مافيش أي أمل في البلد دي !

- أنا مالي ياعم..خلينا في المهم..هتشتري القميص ده ؟!

- لا..خليه عندك..لما الدولار ينزل أبقى أجيلك !

- يا كابتن..تعالى بس أقولك..يا جدع انت..أهو كل يوم من ده..ييجي الزبون من دول يرغي شوية..وبعدين يخلع..وماحدش يشتري !!

 

 

 

 


قيم وشارك المادة :


  
كاتب الموضوع : حسام الدين فكري

كاتب صحفي   / cairo , مصر

مواضيع أخرى قد تعجبك أيضا :


أضف تعليقك على الموضوع
* كاتب التعليق
* عنوان التعليق
  * الدولة
* التعليق