أضيف في 12 دجنبر 2016 الساعة 16:26

هبلة ومسّكوها طبلة !!


حسام الدين فكري

حسام الدين فكري...


في واحدة من أفشل بلاد العالم.. جرى هذا الحوار مع أحد المواطنين البسطاء:


قالوا له : ابسط ياعم..اخترناك لقيادة البلد !


فقال لهم مندهشاً : مين ؟!..أنا !..إزاي يعني..أنا ماليش فيها..ولا عندي أدني فكرة عن القيادة والإدارة !!


فقالوا له : ما هو عشان كده إنت الشخص المطلوب !!


قال : مش فاهم ؟!!


قالوا : ماتقلقش إحنا هنعمل كل حاجة !


قال : طيب وانتوا بتفهموا في القيادة والإدارة ؟!


ردوا بثقة : طبعاً..إحنا بنفهم في كل حاجة..إنت بس سيب المهمة علينا..وخليك في دور الواجهة الرسمية للبلد !


قال : يعني أعمل إيه بالظبط ؟!


قالوا : ولا حاجة..تستقبل الرؤساء زمايلك وترغي معاهم..وتسافر تقابلهم وتلف العالم..وتلقي شوية خطابات في المناسبات الرسمية..إحنا هنكتبهالك !!


قال ثائراً : إيه الكلام ده..أنا كده أبقى خيال مآتة رسمي نظمي فهمي !!


قالوا بهدوء : أيوه..إنت كده فهمت..هو العرض كده..(تيك إت أور ليف إت ) !!


قال مفكراً : طيب والموكب نظامه إيه ؟!


قالوا : هنعملك موكب عظيم..مش موجود في العالم كله !!


- وتوقفوا الناس في عز الحر..وتشلوا حركة المرور..وتعطلوا مصالح البشر ؟!


- أيوه


- ياسلااام..كان نفسي في (الشو) ده من زمان !


- كل اللي نفسك فيه هنعمله ؟


- طيب الأكل نظامه إيه..فيه عندكم ممبار ؟!!


- ممبار إيه ياجدع إنت !..إنت هتاكل حاجات أنضف من كده بكتير..وبعدين في أكلات معينة ماينفعش تاكلها..لازم تسيبها للشعب بس..زي الخيار والموز والبيض..والممبار !!


- وماله..أنا هضحي علشان الشعب ياكل وينبسط !


- هو الشعب مبسوط أصلاً..وإحنا لسه هنبسطه أكتر !!


- يعني إنتوا عارفين تبسطوا الشعب إزاي !


- طبعاً..إحنا خبرة خمسين سنة في الموضوع ده..وياما بسطناه على الآخر !


- أمال الناس بتقول ليه إنكم بتسرقوهم وتحطوا دخل البلد في جيوبكم..وتشتروا أراضي وقصور على قفا الشعب !!


- لا..إحنا بس بناخد مقابل خدماتنا الكتير اللي بنقدمها للناس !


- زي إيه مثلاً ؟!


- زي الطرق والكباري !


- أيوه الطرق المكسرة..والكباري اللي بتقع قبل ماتتسلم !


- ومساكن الشباب والتموين !


- أيوه مساكن الشباب اللي بنص مليون جنيه..والتموين اللي عمرك ماتلاقي الحاجات كلها موجودة فيه أبداً !


- والمستشفيات والمدارس الحكومية !


- أيوه المستشفيات اللي مخصصة لكائنات تانية غير البني آدمين..ومدارس الحكومة اللي يدخلها الطالب يطلع أجهل مما كان !


- وماتنساش أهم حاجة..الأمن والأمان !


- لا بقى..هنا اسمحلي أضرب تعظيم سلام..وأنحني إحتراماً لجهودكم العظيمة..في مواجهة العدو الخفي..اللي مش موجود أساساً !!


- إيه ياجدع..إنت معانا ولا مع مين ؟!!


- معاكم طبعاً ياعصابة..قصدي يارجالة..مادام هتدلعوني معاكم..إنما الشعب بقى..كان الله في عونه !!


 


 


قيم وشارك المادة :


  
كاتب الموضوع : حسام الدين فكري

كاتب صحفي   / cairo , مصر