أضيف في 9 غشت 2016 الساعة 01:28

أغاني من تاني : أنا قلبي إليك ميال !


حسام الدين فكري

حسام الدين فكري...

تألقت المطربة "فايزة أحمد" وأبدعت في واحدة من أشهر أغانيها، تحمل عنوان "أنا قلبي إليك ميال"..وفي هذه الأغنية الست فايزة بتقولك إيه بقى.."أنا قلبي إليك ميال"..وماله..حب شريف وعفيف ومن حقك.."ومافيش غيرك ع البال"..طبيعي جداً مادام قلبك إليه ميال !..إنما بعد كده تقولك إيه.."إنت وبس اللي حبيبي"..يووه..ماعرفنا خلاص..هيه حكاية !..لكن المحبين أصلهم غاويين التكرار..فدائماً يكررون كلامهم بصيغ متنوعة..يعني : بحبك..بعشقك..بدوب فيك..مابشوفش غيرك..إنت اللي في القلب..إنت اللي في اللوز والكرشة والممبار ! .

يعني العاشق من دول لما يكلم حبيبه خمستاشر مرة كل يوم..وكل مكالمة تكسر الساعة على الأقل..هيقول إيه ؟!..ماهو لازم يفضل يكرر..ويعيد ويزيد..ويرجع يأكد ويحلف برءوس الأحياء والأموات..ويقوللها : مش مصدقاني..طب اسألي فلانة واسألي علانة..وكل مكالمة على كده..وشركة الاتصالات تكسب وتزيط..وشركات الموبايل تعمل ملايين من وراء هذه النوعية من المحبين !! .

ونرجع للست فايزة..شوف الجملة دي : "إنت وبس اللي حبيبي..مهما يقول العُذال"..هنا تجد العذال دخلوا في الموضوع..والحقيقة إنهم لا دخلوا ولا حاجة..إنما كل الأغاني القديمة تحشرهم في الكلام..وبتنويعاتهم بقى : العذال..الحُساد..اللايمين..النايمين منهم والقايمين !..وكلها غالباً كائنات أسطورية غير موجودة أساساً..إنما العشاق يحبوا يغمزوهم بالتلميح أحياناً..وبالتصريح أحياناً أخرى..بينما الناس في حالهم..وغير مشغولين بغيرهم..ولايدرون أن فلاناً بيحب فلانة أصلاً !! .

وبعد كده تقولك : "وبحبك أد عينيا..حتى أكتر منها شوية"..وهذه واحدة من ملايين المبالغات العجيبة التي تجدها في الأغاني..يعني هيه بتحبه مثل عينيها..وهذه كذبة أوفر أوي !..فلا أحد يحب شخصاً مثل عينيه أبداً..فلو طلبوا منها أن تأخذ حبيبها وتتنازل عن عينيها هل كانت توافق ؟!..أهو كلام !..وياريتها سكتت على كده..إنما تقول كمان إنه أغلى من عينيها "شوية"..طب هذه الشوية قد إيه..ماقالتش..ماهي بتكذب بقى..لذلك لا تستطيع أن تدلنا هذه الشوية بالكيلو ولا بالمتر ولا بالواحدة..فقد تركتها لخيال المستمع..وكل مستمع يضع فيها الكمية اللي تعجبه !! .

وياريتها كمان سكتت على كده..إنما وسعت منها أوي عندما قالت : "حتى اسألها انت وحلفها – عينيها يعني ! – على طول هتقولك هيه..إنت وبس اللي حبيبي " !..ولا تندهشوا..فالعيون تتكلم في الأغاني..وكل حاجة تتكلم أيضاً..الأيادي..الأرجل..الإبتسامات..النظرات..اللمسات..الغمزات..كله بيتكلم..وبأفصح عبارة..ماهو كله نخع بقى..يعني جت على دي !! .

إنما الأغنية..رغم كل هذه الإفتكاسات الغريبة..من أحلى أغاني "فايزة أحمد"..التي كتبها المتميز "مرسي جميل عزيز" ولحنها شاعر الموسيقى "محمد الموجي"..وتحولت بمرور الوقت إلى واحدة من أروع كلاسيكيات الغناء العربي ! .

 


قيم وشارك المادة :


  
كاتب الموضوع : حسام الدين فكري

كاتب صحفي   / cairo , مصر


أضف تعليقك على الموضوع
* كاتب التعليق
* عنوان التعليق
  * الدولة
* التعليق