أضيف في 18 مارس 2018 الساعة 13:06

دونتيل


جوليانا فلانتينا باناصا ـ مدينتي باناصا الأتريه, و من بلاد المهجر أكتب لها, عاشقة إياها
ودي يا ودي

الدمعه لي طاحت من عيوني
كتبتها الاحلام على قلبي
موال طويل طويل مالوا تقصيصه
كامل مشمول شاربه همي في نيسكافيه
قصة عذاب مازالت ماسالت قدامي في بوفي

ودي يا ودي
جات تروي الفراشة قصة العذاب في كناش الدنيا
قلبي كاع تبلاو انا لي كنت فاكرة اني شمس الضحى
ارضي تروات بالبكا
لقط لقط زرع الهم باللغى
همي من زرعوا عنوان يتقرا
مرصع في دونتيل قفطان الهوا
يتقرا دموع الغرام المسموم

كالت عليها تكوني في يوم من الأيام
الدمعه شحال من عام و هي متحجرة في بيت العيون
يا با ,يا با
القرح سكن الجفون
حالف يكون
فكرت و فكرت ما خابت الظنون
لي مكتاب مكتاب على الجبين سر مكنون
راه الفرح في القلب حالف هماز لماز في ضلوعي مسجون
ما يطلع ما يزهق راه همي موزون
الساكن يا ساكن مشعل البخور في الكانون
يقهر بالظلم في قلبي مسكون
حبابي خباوا عليا في سر الفرح المدفون

الف- قصة و روايه , تنحتث على الحجر
قاصحة هدامه
دمعة العيون دايرة كرون
ديوان الحزن كتاب مشروع مسنون
سنة الهم تكتبات بالأقلام صمق فرعون
لي جات بالهوى تضر
الف قصة و روايه تكتبت ترقمت تشمعت بالظلم
نشرتها اليوم قصيدة على دمعة الهم
تعاود حكايتي
تزيد نكايتي
كيتي يا كيتي
يا يوا يا يووووو
السوالات لو كانت ناقصة من السيناريو
غمام الدموع جا في مايو
ريح العجاج ينوض للقلب دموا
يطيح فيا النصاص
دفات قلبي تقلص
جناحي بالمقص يتقص
ما بقات لا فرحة لا حلوة لا فقاص
كلشي مني يتملص
ما بقا فيا ما لا نكلس لا نعس
لا نحس كلشي تتكدس الحزن بالعرام تتغرس
لا نشرب الفرحه من كاسوا
لا نشطح اه و نص

قصيدة
فرقت حروفها على كرون السم
يتلام الكلام يتصنع منوا اوهام
يترصع بالوجم على حناكي يترسم
سرب الحمام يغني حكاية الوجه المصدوم
على امواج البحر الفارق يتقفى الكلام

الليل يا الليل
شارب ايداموا
زاد هاز سلهاموا
على قلبي بلغني سلاموا
كبت فيا احلاموا
سلام بارد مهموم
ما يفك من الواحايل
ا سيدي ا لالاه ما بقا ما يتكال
غريبه الوشم همهما تتقاس بالاكيال
يا موميمتي فوقاش تطوى هاد الجبال
دنيا زايداني بالمحاين هازة الهم جايلة بالترحال

خايفه لوحدي
نفك و نخمم
نحل و نعكد
نعكد و نحل
الحل
يا مول الرجا
يا لي سماك قبة سامعة
مديت يدي ليك نطلب الرجا
فتحت قلبي ليك بالدعا

نخمم يا مول الرجا
يا مول الرحمه
هزيت كفوفي للسما
نفضت يدي من تراب الوجع
دفنت الهم في بلاد الهم حتى تنسى

يا مول الرجا و الرحمه
من باب السما شربت ما الرحمه
مسحت من قلبي الظلمة
تكيت على مخدة الورد اللي جاية من الجنه

يا مول الرحمه
الهوا حالوا صعيب
ما لوا قصيدة ترصى عليها الكلمة
خطير ما لوا حكمة
غدار قاتل يلوحك بالهم
اكعد ماية عامو تمة

انا يا انا لي الفرحة ما جمعتني في كتاب كبير
لاوحني الهم في قلب البير
بير غارق تتغير ماه بالشر تطير
عيت من التعبيرما بقى لا خير لا خمير
كالوا لي باركة من التبرير
راه الهم شانوا كبير كبير كبير مرصع في دونتيل الهم راك تحير

دونتيل.

ج ف باناصا


قيم وشارك المادة :


  
كاتب الموضوع : جوليانا فلانتينا باناصا ـ مدينتي باناصا الأتريه, و من بلاد المهجر أكتب لها, عاشقة إياها

الحياة, و بلادي التي أحب , و تسكن في الذات و في الروح , بلادي ,لك كل الحب .   / الفيس بوك :Juliana Valantina Panasa . مدينة باناصا الأثريه , المغرب